बाढीपीडितका लागि आदर्श इङ्लिस बोर्डिङ स्कुलद्वारा ४२ हजार ४७५ रुपैयाँ सहयोग

कपिलवस्तुको बुद्धभूमि नगरपालिका–९, इमिलियास्थित श्री आदर्श इङ्लिस बोर्डिङ स्कुलले भोटेकोशीमा गएको बाढीबाट प्रभावित बाढीपीडितका लागि ४२ हजार ४७५ रुपैयाँ सहयोग गरेको छ।

विद्यालयका विद्यार्थी, शिक्षक तथा विद्यालयको तर्फबाट संकलन गरिएको उक्त रकम प्रधानमन्त्री दैवी प्रकोप उद्धार कोषमा जम्मा गरिएको विद्यालयले जनाएको छ।

बाढीपीडितका लागि सहयोग रकम जुटाउन विद्यार्थीहरूले समेत उत्साहपूर्वक सहभागिता जनाएका थिए। विद्यार्थीहरूले आफ्नो खाजाको रकमसमेत कटाएर सहयोग गरेका थिए। शिक्षक तथा विद्यालयको तर्फबाट समेत सहयोग थप गरी कुल बयालिस हजार चार सय पचहत्तर रुपैयाँ संकलन गरिएको विद्यालयका प्रबन्ध निर्देशक कृष्ण भट्टराईले जानकारी दिनुभयो।

विपद्को समयमा पीडितलाई सहयोग गर्नु सामाजिक दायित्व भएकाले विद्यार्थी, शिक्षक तथा विद्यालय परिवारको संयुक्त प्रयासमा उक्त रकम सहयोग गरिएको भट्टराईले बताउनुभयो।