थेराङखोलामा दुई पुल बगेपछि मनास्लु–लार्के पदयात्रामा रोक

२३ भदौ, काठमाडौं। गोरखाको चुमनुब्री गाउँपालिका–४ नामरुङस्थित थेराङखोलामा आएको बाढीले दुईवटा पुल बगाएपछि मनास्लु र लार्केपास पदमार्ग जोखिमपूर्ण बनेका छन्। जिल्ला प्रशासन कार्यालय गोरखाले अर्को सूचना जारी नभएसम्म पदमार्गमा पदयात्रा नगर्न नगराउन आग्रह गरेको छ। प्रशासनका अनुसार २१ भदौ बिहान करिब साढे ३ बजे आएको बाढीले चुमनुब्री–४ र वडा नं. २ जोड्ने फलामे पुल तथा नामरुङ जंगलतर्फ जाने बूढीगण्डकी नदीमाथिको झोलुङ्गे पुल बगाएको हो। पुल बगेपछि आवागमन प्रभावित हुनुका साथै पदमार्गमा यात्रा जोखिमपूर्ण बनेको प्रशासनले जनाएको छ। पदयात्री, पर्यटन व्यवसायी र पथप्रदर्शकलाई प्रशासनको सूचनाको पालना गर्न आग्रह गरिएको छ। विपद् वा असामान्य अवस्था देखिए नजिकको सुरक्षा निकाय, प्रहरी चौकी वा स्थानीय तहमा तत्काल जानकारी गराउन अनुरोध गरिएको छ।