रसुवा बाढीपीडितको पहिचानका लागि प्रहरीले डीएनए परीक्षण प्रक्रिया अघि बढायो।

१८ भदौ, काठमाडौं । भोटेकोशी बाढीपछि बेपत्ता नागरिकको खोजी तथा भेटिएका बेवारिसे शव र मानव अंग पहिचान गर्न नेपाल प्रहरीले डीएनए परीक्षण प्रक्रिया अघि बढाएको छ। भदौ १० गते आएको भीषण बाढीपछि नदी किनार तथा तटीय क्षेत्रमा भेटिएका शव पहिचानका लागि प्रहरीले सूचना जारी गरेको हो। प्रहरीले स्वदेश तथा विदेशमा रहेका बेपत्ता नागरिकका पहिलो पुस्ताका नातेदारलाई डीएनए नमुना उपलब्ध गराउन आग्रह गरेको छ। बाबु, आमा, छोरा वा छोरीमध्ये नजिकका आफन्तले दुई प्रति पासपोर्ट साइज फोटोसहित उपस्थित हुनुपर्नेछ। स्वदेशमा रहेका आफन्तले नेपाल प्रहरी अस्पताल महाराजगञ्जको प्याथोलोजी ल्याब वा नजिकको जिल्ला प्रहरी कार्यालयमा ताजा रगतको नमुना दिन सक्नेछन्। विदेशमा रहेका आफन्तले भने सम्बन्धित नेपाली दूतावास वा नियोगमार्फत डीएनए नमुना उपलब्ध गराउन सक्ने प्रहरीले जनाएको छ।