कृष्णभिर पहिरो हटाउन १८ जनशक्ति परिचालन, रुख कटान कार्य सुरु

पृथ्वी राजमार्गअन्तर्गत कृष्णभिरमा पहिरो पन्छाउने काम तीव्र रूपमा अघि बढाइएको छ। पूर्वाधार विकास मन्त्रालयका अनुसार पहिरोको दुवै छेउबाट १८ जना जनशक्ति परिचालन गरी रुख कटान सुरु गरिएको छ। आवश्यक निर्माण उपकरण पनि सडकका दुवै छेउमा तयारी अवस्थामा राखिएको छ। रुख कटान सम्पन्न भएपछि उपकरण परिचालन गरी पहिरो हटाउने काम सुरु गरिने मन्त्रालयले जनाएको छ। सडक सञ्चालनलाई प्राथमिकतामा राखेर काम भइरहेको बताइएको छ। कृष्णभिरमा सडक भासिँदा काठमाडौंको आपूर्ति व्यवस्था प्रभावित भएको छ भने उपत्यका आवतजावत गर्ने यात्रुले सास्ती भोगिरहेका छन्। यसको असर बजारमा समेत देखिन थालेको छ।